بالصورة.. كيف دافعت مي كساب عن زوجها "أوكا" بعد حبسه

دافعت الفنانة مى كساب عن زوجها "أوكا"، من خلال حسابها الشخصى على موقع التواصل الاجتماعى "فيس بوك"، بعد حبسهما مؤخرًا.

وقالت "مي": كل اللي يعرفني من قريب يعرف كويس أني عمري ما كرهت حد ولا عمري أذيت حد ولا عمري عملت تصرف مخل بالشرف ولا اتنازلت عن شرفي ولا كرامتي في يوم من الأيام واستحملت ظلم كتير واضطهاد ومحسوبيات وكنت طول الوقت بصبر نفسي بكلام أبويا الجميل اللي رباني على القناعة.. كان دايمًا يقولي انتي عامله زي عسكري في الجيش كل شوية بيترقي بجهده وتعبه ويتنقل من سلاح لسلاح.. أنا مريت بظروف صعبة كتير في حياتي بس للأسف بقالي ٤ سنين مش بشوف يومين حلوين على بعض.

وتابعت: أنا باعيش أقسى أيام حياتي من يوم ١/١٢/٢٠١٢ يوم ما اكتشفت أن أمي عندها السرطان وأنا مش "مي" أنا واحدة تايهه مش لاقيه نفسها.. موت أمي كسرني ومن بعدها أحداث كتير قوي وجعتني.. القريبين مني عارفين أنا استحملت حاجات صعبة كتير أد أيه السنين اللي فاتت بس الصراحة ده أصعب موقف اتحطيت فيه من يوم ما اتولدت مش عشان ده جوزي وحب عمري وإحساسي بعدم وجوده جمبي كان روحي متاخده من جسمي لا عشان متاكده أنه مظلوم.

وأضافت "كساب": متأكدة أنه ضحية طيبته وسذاجته، وللأسف ضحية تعليمه المتواضع الضحل.. ضحية ثقته الزيادة عن اللزوم في أي شخص يقرب منه ويضحك عليه ويقوله أنا هاعملك ويوعده وعود كدابة، وفي الآخر يستغله ويورطه.. طبعًا لما بتكلم عن "محمد" كأني باتكلم عن "أحمد" كمان "أوكا وأرتيجا".. روح واحده في جسدين.. ثقتي في رب العالمين كبيرة جدًا أنه هينصرهم ويفك كربهم.. ثقتي في عدالة القضاء العسكري كبيرة أنه مش هيظلمهم.. ثقتي في قلوبكم الرحيمة كبيرة إنكم هتقفوا جمبهم.. إدعولهم وإدعموهم.. أقسم بالله العلي العظيم "أوكا وأورتيجا مظلومين.

وكان المدعي العام العسكري، قد أمر مؤخرًا حبس المطربين الشعبيين أوكا وأورتيجا 15 يومًا احتياطيًا على ذمة التحقيقات، حول اتهامهما بتزوير شهادة أداء الخدمة العسكرية والوطنية، وذلك في أعقاب القبض عليهما في مطار القاهرة أثناء التوجه إلى دبي.