فقط في رمضان ... لوعندك أولاد " بيع التليفزيون " !

أنا لا أصنف نفسي رقيب علي أحد ولكن حالة الإستغراب لم تفارقني منذ شاهدت تيترات المسلسلات ووجدتها مزينة ب +18 و + 16 ده حتي لاقيت حاجات +12  يعني من الآخر كده لو عندك ولاد في أي فئة عمرية ما يتفرجوش ... إيه ده ؟ ، يعني إزاي ! ، ده تليفزيون ودي قنوات مصرية مفتوحة مش " hot bird " مثلا ، وبتعرض مسلسلات مصرية مش " تركي " ولا " مكسيكي " ، و إحنا في رمضان مش ... مش في إيه .. العيب عيب طول السنة .

طب يعني نعمل إيه عشان نلتزم بقرار " الرقابة " ، ده في ناس عندهم تليفزيون في كل غرفة ، طب " نخدر " الولاد قبل عرض المسلسلات ؟ ، أكيد مش ده الحل ، طب " نغمي عنيهم " ؟ ، وبعدين ماهو  في ألفاظ  " خارجة " ، طب " نسد ودانهم " كمان  ؟ ، مش حل برده ، خلاص الحل الوحيد إن اللي عنده أولاد يبيع التليفزيون ويقضي رمضان مع " الراديو " .

أعلم تماما أن تلك الأعمال تكلفت ملايين ووارئها جيش من الممثلين والكتاب و المخرجين والفنيين الذين عانوا لأكثر من ٩٠ يوم عمل شاق ولكني أتسائل أين المنظومة ؟ ، المنظومة عبارة عن جهة إنتاج و رقابة و قنوات عرض ، لماذا لا يكون هناك تنسيق بين الثلاث جهات حتي لا يحدث التخبط الذي نراه حاليا ، فالثلاثة يشتكون و يخلون مسؤليتهم ، المنتج يقول ان الرقابة وافقت و القناة تحذف ، و الرقابة لقول لم نوافق و يجب الحذف ، والقناة تحاول إرضاء المنتج و الرقابة ولا تستطيع و المشاهد الغلبان تايه ومش فاهم حاجة ... أعتقد الحل إن " حد كبير " يقعد مع الثلاثة وينسق بينهم بشكل واضح حتي لا يتكرر ما يحدث مرة أخري .