سارة فؤاد تكتب... تحليل كامل لألبوم "الهضبة"
أخيراً بعد طول انتظار جت اللحظة اللي بستناها من البوم لألبوم، ٥ البومات من أول
"بناديك تعالى" وانا بحلل البوم #الهضبة وبستنى اللحظة اللي هعبر فيها
عن احساسي مع "الجمهور" ونحط تحت جمهور دي مليون خط" بعد سماع
"شريطه الجديد" وربنا ما يقطعها عادة.
وطبعا مش محتاجة انوّه زي كل مرة اني مش هقول رأي فني بحت عشان انا
مش دارسة مزيكا، بس بعشقها وبقول اللي بحسّه، سواء اتفقنا او اختلفنا عليه فا هو
في الآخر رأيي الخاص اللي عمره ما هيأثر عليك ياللي بتقرا.. شايفاك وربنا
• #عمرو_دياب البوم كل حياتي + الأغنية السينجل الزيادة
- سماعاتنا في ودننا
- ساندويتشاتنا في جيبنا
- مطوتنا في شرابنا
- نشغل الالبوم واحنا بنقرا اغنية اغنية 😍
١ - يا
ساحر
كلمات : تركي آل شيخ
الحان: عمرو مصطفى
توزيع: أسامة الهندي
جيتار: أحمد حسين
- لون مختلف وجديد على عمرو عشان يجاري العصر، اللون المختلف ده سببه
الرئيسي عمرو مصطفى اللي طول عمره بيعرف ايه اللي يليق على دياب حتى لو لحن غريب
وغير معتاد عليه.
انا سعيدة جدًا يا أسامة بالتفاصيل اللي انت مهتم بيها في توزيع
الأغنية دي،الالات اللايف والصرف باين، تطور ملحوظ عن الالبوم اللي فات خصوصاً في
توزيع الاغنية السريعة.
مستعجلين على تركي صح؟ مش دلوقتي 😁
أحمد حسين لعب كلاسيك واليكتريك جيتار احلى من بعض وعمل صولو كان
من اسباب نجاح الأغنية دي بقوة، فكرني بأيام شقاوة صولو "وماله" بتاع
خوان سيرو الله يمسيه بخير هو وشعره الحرير، وصولو مصطفى أصلان في أغنية خليك
معايا.
قبل ما أعلق على كلمات الأغنية لازم تفصل تماما بين تركي الفنان
وتركي الإنسان، احنا بنحلل البوم مش ماتش كورة.. آمين ؟
- قول آمين !! 😠
- ايوة كده 😁
- كلمات الاغنية عادية ومفيهاش جديد خصوصا "خليك في الهادي
العادي قصادي.. مش للدرجادي" اللي مكتوبة فقط من اجل الوزن والقافية، لكن من
حسن حظ "كاتب" الأغنية ان اللحن حلو والتوزيع هايل بس ابوس ايدك كفاية
صفافير يا أسامة.
٢- يتعلموا
كلمات: تامر حسين
الحان: عمرو مصطفى
توزيع: أسامة الهندي
جيتار: شريف فهمي
الشخلعة كلها، الدلع على أصوله، أغنية الأفراح الرسمية الفترة اللي
جاية.
الأغنية من اولها لآخرها مبهجة وخفيفة ع القلب وكل ما تسمعها اكتر
كل ما هتحبها اكتر.. تامر حسين وعمرو مصطفى فاهمين بعض لدرجة انهم بيعرفوا يعملوا
السهل الممتنع اللي بيرضي الجمهور.
جيتارات شريف في الفواصل مدية حتة دلع كده عاجباني ومميزة.
التوزيع مقسوم عادي مفيهوش ابتكار.
٣- كنت في بالي
كلمات: نادر عبد الله
الحان: وليد جويد
توزيع: أسامة الهندي
جيتار: أحمد حسين
كمان: مصطفى داغر
الأغنية اللي رجعّت نص المفركشين لبعض.
مفيش حد سمعها الا وافتكر الـ Ex
حاجة كده تقطيع شرايين.. قصة قصيرة حزينة مؤثرة فيها احساس طاغي مع
ندم و توهان على ضيق تنفس. عمرو بطل الأغنية لأن احساسه وصل بزيادة، بيغني من جوّه
اوي.. بيثبتلنا ان احساسه مش محتاج مزيكا عشان يوصلنا. طبعا عشان يقضي علينا تماما
دخل مصطفى داغر علينا بصولو الكمان اللي كان من ضمن الحاجات اللي جابتنا لمس
اكتاف. والحقيقة ان الصولو ده فكرني بمروان انور وشفته في الباك جراوند.
نادر عبد الله ابدع في كل كلمة في الاغنية ومستحيل تسرح وانت
بتسمعها وهتتأثر حتى لو في اسعد حالاتك لا مفر. حمد الله ع السلامة يا نادر احنا
مش ناسيينك ده انت من ريحة الحبايب
* ملحوظة: نادر عبد الله هو كاتب ريحة الحبايب وبعد ١٥ سنة- ايوووة
والله ١٥ سنة احنا عجزنا- كتبله "كنت في بالي لسه حالا من مفيش من بعدي عايش
ولا مش عارف تعيش؟"
* كان نفسي اسمعها بتوزيع نادر حمدي خصوصا ان التوزيع اتغير من نادر
لأسامة فجأة.
٤- قالك ندم
كلمات: صابر كمال
الحان: عمرو دياب
توزيع: نادر حمدي
جيتار: أحمد حسين
هو ده عمرو دياب.. لازم يدينا جرعة نوستالچيا في النص عشان نفوق
كده ونصحصح، وطبعا اذا ذكر المقسوم ذكر عمرو دياب اللي فاهم وعارف جمهوره بيحن لإيه..
وانت بتسمع "ملكش عندي غير كلمة واحدة بس اقولها ازاي دي طيب؟" بغض
النظر عن الكلمة اللي مش عارف يقولها، هتفتكر على طول "وانت غاوي وعود في
الهوا كل سنة بقى وانت طيب" من اغنية "معاك بجد" البوم "كمل
كلامك"و لما تسمع ده "ده انا اللي قلته على يوم بعادنا لو جه في خيالك
تتصدم" احتمال تيجي في بالك "دخلتي قلبي ومن يومها معدش يحلم غير بيكي
دنيا بترميلي همومها تدوب في لحظة ما الاقيكي و ادي الحياة بتفرقنا..." من
اغنية "ولا الليالي تهون
"
من البوم "ويلوموني".
اما لو سمعت السينيو بتاع "قال ايه راجع ندمان وفاكرني زي
زمان" هتفتكر "مع اني في ذكرياتك اول حب في حياتك" من اغنية
"كده عيني عينك" البوم "تملي معاك".
من الاخر الاغنية دي فيها ريحة عمرو دياب اللي كلنا كبرنا عليه.
طبعا الكلام تقيل ومش سطحي وتحية كبيرة للشاعر صابر كمال على
الكلام التقيل ده.
التوزيع المقسوم مبينش امكانيات نادر حمدي اللي كلنا كنا منتظرينه
بقوة في الالبوم ده.
٥- هدد
كلمات: تركي آل الشيخ
الحان: أحمد الهرمي
توزيع: أسامة الهندي
جيتار: شريف فهمي
من احلى أغاني الالبوم شكلا وموضوعا رغم تشابه مذهب الدخول بأغنية
رجب لهيفا وهبي. لكن لو دورنا كويس هنلاقي ان اللحن ده يعتبر من انواع الفلكلور
وكذا حد استخدمه قبل كده زي مثلا موسيقى مسلسل التؤام لعمار الشريعي وموسيقى مسلسل
جلباب أبي لحسن أبو السعود.
طبعا الكلمات مليش دعوة مين مشتريها من مين ومقدرش اقول غير ان
الكلام فعلا حلو ومش اي حد يكتبه بسهولة وتحية كبيرة للي كاتبها.
عمرو غناها بحرفنة وطرب واديله في العُرب وانا احبك يا فننس 😍
وكله كوم و آهاته في آخر الأغنية كوم تاني.. حتة كده من آهات أغنية
"ملهاش حل تاني" البوم "ويلوموني".
التوزيع حلو يا أسامة 😁
٦- كل حياتي
كلمات: تركي آل شيخ
الحان: محمد رحيم
توزيع: نادر حمدي
عارفين ايه احلى حاجة في الاغنية دي اللي هي المفروض هيد الألبوم ؟
التوزيع.. شكرا يا نادر عشان خليتها تعدي على خير.
كنت مستنية اكتر من كده بكتير من رحيم
وطبعا مش مستنية حاجة من الشاعر ولا من جناح الخيال اللي بيطير.
واهات عمرو في الآخر مش محتاجة كلام...
٧- ملاك الحُسن:
كلمات: تركي آل شيخ
الحان: عمرو مصطفى
توزيع: نديم حميد الشاعري
جيتار: جالليلو
ملحمة موسيقية من اول دقيقة.. توزيع نضيف محترم مصروف عليه ونديم
بيطلع كل اللي عنده عشان يثبت نفسه، ابن الوز عوّام صحيح!
التوزيع وعمرو مصطفى هما سبب نجاح الأغنية دي ولا تعليق على
الكلمات.
اسمعوها على سماعات هتنبهروا بالتوزيع.
٨- باين حبيت "رؤية
عمرو دياب"
كلمات: تامر حسين
الحان: عمرو مصطفى
توزيع: أسامة الهندي
جيتار: أحمد حسين
طيب ينفع الحنية دي طيب؟
طيب اللي مبيتنيلش بيحب يتصرف ازاي؟
يكلم هشام رامز - بصوت علاء مرسي؟ 😁
انت بتقول باين حبيت وانت واقع لشوشتك وباين اوي على فكرة وربنا
يزيدك من نعيمه.
يا جماعة سيبوا الراجل يحب لو هيغني بالاحساس ده!
الكلام واللحن والتوزيع اللي هو "رؤية عمرو دياب" مع
جيتارات احمد حسين كلهم على بعض عاملين حالة حلوة.. وعمرو مبدع في العُرب عشان
رؤيته تبان ويعلم على مارشميلو 😁
٩- انت مغرور
كلمات: أيمن بهجت قمر
الحان: محمد يحيى
توزيع: نادر حمدي
جيتار: أحمد حسين
كوله: عبد الله حلمي
اذا ذكر أيمن بهجت مع محمد يحيى ذكر مصطلح "أغنية
الألبوم" او بمعنى آخر الحقنة اللي بتعلّم.
أموت واعرف أيمن اقنع عمرو يغني الكلام الجرىء ده ازاي؟ شربه ايه
بالظبط؟ بس احنا كجمهور مبسوطين جدا من الجرأة واللون الجديد على عمرو ده.
لو مغلول، زعلان، مكبوت، متعصب، مكتئب اسمعها والله هتريحك زي
البناداول اكسترا كده.
خبرة نادر حمدي ظهرت في توزيع الأغنية دي وحلوة اوي فكرة الـ beats وفكرتني بـ"علم قلبي".
١٠- باين حبيت "مع
مارشميلو"
كلمات: تامر حسين
الحان: عمرو مصطفى
توزيع: مارشميلو
جيتار: أحمد حسين
كنت متوقعة من مارشميلو احلى من كده بكتير.. بكتير اوي، بس هي
هتشتغل في الـ Clubs زي
الفل وخطوة حلوة ان عمرو يتسمع في العالم كله.
١١- ده لو اتساب
كلمات: أيمن بهجت قمر
الحان: محمد يحيى
توزيع: أسامة الهندي
جيتار: أحمد حسين
اول أغنية نزلت قبل الهنا بسنة.
محدش استوعبها اول ما نزلت.. بعد شوية بدأت تحلو.. ولما نزلت مع
الالبوم بقت لطيفة.
أغنية خفيفة سواء كلام او لحن او توزيع ومش هكتّر عن كده.
١٢- يا هناه
كلمات: نادر عبد الله
الحان: محمد النادي
توزيع: طارق مدكور
جيتار: مصطفى أصلان
من احلى اغاني الالبوم من وجهه نظري لأنها سلسة وبسيطة وبتدخل
القلب على طول وتحس وانت بتسمعها ان الفرحة داخلة قلبك كده كده متحاولش!
وطارق مدكور اصلا وحشنا فا هنحب اي حاجة تيجي من ريحته.
الأغنية دي مش هتعرفوا قيمتها دلوقتي يا جماعة.
اتقلوا عليها شوية.
الـ latin music بتعيش
كتير وعلى هوانا
.. نسيتوا قدام عيونك؟ طبعا لأ
وهتعمل قلق في الحفلات والـ clubs
١٣- تعالي:
كلمات: تامر حسين
الحان: عمرو مصطفى
توزيع: أسامة الهندي
جيتار: أحمد حسين
أقل أغنية في الألبوم واتزهق منها بسرعة البرق.
الكلام خفيف واللحن شبه الحان كتير اوي لعمرو ولا تعليق على
التوزيع الإلكتروني المزعج.
١٤- بحبك أنا
كلمات: تركي آل شيخ
الحان: عمرو مصطفى
توزيع: أسامة الهندي
السينجل اللي نزلت بعد الالبوم بأسبوع واحد فقط فجأة وبدون مقدمات
ولما نزلت عملت قلق.
والقلق ده عشان تلات حاجات:
١- لحن من الزمن الجميل
٢- احساس وتألق عمرو دياب فيها.
٣- أسامة الهندي
هسميها الطقطوقة لانها عجبت الجيل الكبير قبل الصغير عشان الستايل
الطربي اللي مبين امكانيات عمرو.
———
* شكرًا للهضبة اللي بقاله اكتر من ٣٠ سنة بيفرحنا.
اتعلمنا منك حاجات كتير اهمها الذكاء والاجتهاد والاستمرارية.
ربنا يديلك طولة العمر وتفضل رقم واحد في نظر جمهورك زي "ما
عودتنا".
وكل سنة وانت طيب وعارف انت بتعمل ايه