أحمد سعد: "كل خناقاتى مع زوجتى سببها الجوع.. ولغيت كتب كتابى منها 7 مرات"

وأضاف سعد خلال حواره ببرنامج "90 دقيقة"، المذاع عبر فضائية "المحور": "عشان أراضيها لازم أديها سندويتش، وبعدها ممكن تتنازل عن أي حاجة، لكن مش أي حاجة، في مرة قالت لي عاوزين ناكل من كبدة الفلاح، فقلت لها سندويتشين؟! قالت لي وجبات".. لترد عليه زوجته قائلة: "يومي كله أكلت فيه سندويتش أنهيه بفينو؟!".

وقال: "لازم أجيب 5 وجبات في اليوم، أجيب ألماظ أحسن، كنت عايز أخد قرض من البنك عشان أأكلها بالقسط"، مشيرًا إلى أنه قرر أن يكون حفل زواجهما بعيدا عن الصحافة والإعلام: "حددنا موعد الحفلة 7 مرات، حصل عوكوسات غير عادية، رغم إننا بنحصن نفسنا بالصلاة والأذكار". 

وتابع: "حجزنا في نصف جوامع وفنادق مصر، ولسه موجودة، لأننا بنتخانق مع بعض، ولما أقولها هاتي المقدم تقولي مليش دعوة، وكلها خناقات مفتعلة بشكل غير عادي، رغم إن الحاجات الكبيرة بتعدي، وأخر ما زهقنا حددت موعد كتب الكتاب مع والدتها من غير ما نعرفها، إن شاء الله أتجوزها بلبس الجيم".

وأشار، إلى أن أشقائه غضبوا منه بسبب عدم الإعلان عن موعد زفافه: "مقلتش لأي حد، والناس عرفت من الصحافة إني هتجوز، أخويا عمرو سعد معرفش ومفيش مخلوق عرف، حتى هي اتفاجأت وقلت لها بعد بكرة كتب كتابنا، وفي الآخر خبر الزواج طلع قبله بيوم ومنعرفش ازاي".