بعد روايته عن عفاريت شقة الزمالك.. محمد هنيدي: "العالم السفلي بيحبوني"

كشف الفنان محمد هنيدي النجم الكوميدي الكبير، تعرضه لمواقف بها جن وما يخص العالم السفلي، ولكنه لم يسعى إليها، وعن سؤال منى الشاذلي له في برنامجها "معكم": "يعني إنت قلبك خفيف في الحتة دي؟"، ليرد مازحا: "مش أنا يا فندم ده كل العالم، يعني أقعد أتكلم مع عفريت عادي؟".

وقال خلال لقائه مع الإعلامية منى الشاذلي، ببرنامج "معكم منى الشاذلي" المذاع على قناة "سي بي سي": "كنت في فترة عرض مسرحية "حزمني يا" أجرت شقة في الزمالك بـ 600 جنيه كانت سلفة من الفرقة، وكان معي يومها عود، وسكنت فيها أنا وزميلي أحمد عبدالله، ومضينا عقد الشقة ومبسوطين بالبيت اللطيف".

 

وتابع: "أول ما فردنا ضهرنا في الأوضة، سمعنا في المطبخ جنبنا حالة طبيخ كاملة، كأن ست بيت في المطبخ والطشة وكله شغال، واحنا نتوتر أكتر وهما يعلوا الصوت جوة مع صوت الحنفيات"، مضيفا في مزحة "كأن أمك بتطبخ ومكانش ناقص غير نشم الريحة".

 

واستكمل: "قلت لأحمد هو أنا بيتهيألي؟ قالي لا أنا سامع زيك بالظبط، وشوية وأحمد قال إنه حاسس إن السقف بينزل، قلتله: هنموت يعني في السرير؟ ماإحنا لازم ناخد قرار.. وخدنا الشنط بالعافية وحالة رعب غير عادية، واحنا بنلم الحاجة هما بيعلوا الصوت في المطبخ اللي هو امشوا وغوروا يعني".

 

ولفت إلى أنه أثناء نزوله على السلم في حالة من الرعب والهرولة كسر العود، ليراهم البواب ويقول لهم "إيه دي؟ هو محدش قالكم؟" مما يؤكد أن هذه الشقة كانت مشهورة، لتقول له منى الشاذلي: "يعني انت مجاش ليك الفضول تروح تشوف ايه في المطبخ؟"، ليرد مستنكرا في مزحة: "نروح فين يا هانم؟"، فتعقب: "واضح إنك ليك علاقة بالعالم السفلي بينجذب ليك"، فيجيب ضاحكا: "آه بيحبوني".